शिंदे गटाचे मंत्री केसरकर शरद पवारांच्या भेटीला; मराठा आरक्षणावर चर्चा झाल्याची माहिती

 

मुंबई :- राज्यातील राजकीय वर्तुळात सध्या वेगवान घडामोडी घडत आहेत. अशातच शिवसेनेचे नेते, कॅबिनेट मंत्री दीपक केसरकर यांनी राष्ट्रवादीचे सर्वेसर्वा शरद पवार (Sharad Pawar) यांची भेट घेतली. सकाळी दीपक केसरकर यांनी शरद पवारांची भेट घेतली. पुष्पगुच्छ देऊन शरद पवार यांना सदिच्छा दिल्या. तसंच केसरकर यांनी शरद पवार यांच्या तब्येतीचीही विचारपूस केली. ही सदिच्छा भेट घेतल्याची माहिती दीपक केसरकर (Deepak Kesarkar) यांनी दिली.

शरद पवार आणि दीपक केसरकर यांच्या भेटीत वेगवेगळ्या मुद्द्यांवर चर्चा झाल्याची माहिती आहे. शालेय आणि माध्यमिक शिक्षण पद्धतीमध्ये होत असलेल्या बदलांवर शरद पवार यांच्याशी चर्चा केली. शिवाय शिक्षण क्षेत्रातील अपेक्षित सुधारणा, शिक्षक आणि शिक्षकेतर कर्मचारी यांच्या समस्या निवारण कशा करता येतील, अशा विविध विषयांवर चर्चा केल्याचे दीपक केसरकर यांनी सांगितले.दीपक केसरकर (Deepak Kesarkar) यांनी या भेटीचा फोटो ट्विट केला आहे. शरद पवार यांची आज सदिच्छा भेट घेतल्याच या ट्विटमध्ये केसरकर म्हणाले आहेत. या दोघांमध्ये मराठा आरक्षणाबाबत चर्चा झाल्याची सुत्रांची माहिती आहे. या भेटीनंतर राजकीय वर्तुळात पुन्हा एकदा चर्चांना उधाण आलं आहे.

सध्या मराठा आरक्षणाचा (Maratha Aarakshan) मुद्दा चर्चेत आहे. आरक्षणाच्या मागणीवर मराठा समाज ठाम आहे. 40 दिवसांच्या मुदतीनंतरही निर्णय न झाल्याने मनोज जरांगे पाटील हे पुन्हा एकदा उपोषण करत आहेत. राज्यभर आंदोलने केली जात आहेत. मोर्चे काढले जात आहेत. उपोषणे केली जात आहेत. मराठा समाज आक्रमक झाला आहे. त्यामुळे राजकीय नेत्यांना गावबंदी करण्यात आली आहे. अशातच आता शरद पवार आणि दीपक केसरकर यांच्या भेटीत मराठा आरक्षणावर चर्चा झाली असल्याची माहिती समोर येत आहे. त्यामुळे येत्या काळात मराठा आरक्षणावर तोडगा निघतो का हे पाहणे महत्त्वाचे ठरणार आहे.